ഫ്രാങ്കോ കേസിലെ വിധിന്യായം

289 പേജുള്ള ഫ്രാങ്കോ കേസിലെ വിധിന്യായം പൂർണ്ണമായും വായിച്ചു

പ്രോസിക്കൂഷൻ കേസ് ഇതായിരുന്നു എങ്കിൽ പൂർണ്ണമായും പ്രതിഭാഗത്തിന് അർഹിക്കുന്ന വിധി

പൊതുബോധത്തെ തൃപ്തിപ്പെടുത്താതെ കാര്യകാരണ സഹിതം നിയമവാഴ്ച ഉയർത്തിപ്പിടിച്ച വിധിയെഴുതിയ ജഡ്ജിക്ക് അഭിനന്ദനങ്ങൾ..

👉കേസ് തോൽക്കാൻ കാരണം പ്രോസിക്കുഷനും,. പോലീസും. പ്രോസികൂഷനും, അന്വേഷണ സംഘത്തിനെയും പരോക്ഷമായി നിശിതമായി വിമർശിച്ച് വിധി

👉ഇരയായ കന്യാസ്ത്രീയുടെ മൊഴികളിലെ പ്രകടമായ വൈരുധ്യം കേസിൽ പ്രധാനപ്പെട്ട കാരണമായി. ഇരയുടെ മൊഴികൾ വിശ്വാസ യോഗ്യമല്ലെന്ന് കോടതി

👉നിർണ്ണായകമായ ഇരയുടെയും സാക്ഷികളുടെയും ഫോണുകളും, ലാപ്ടോപ്പും, മൊബൈൽ രേഖകളും ഒന്നും കോടതിയിൽ നൽകാതെ തകരാർ ആയ ഒരു ഹാർഡ് ഡിസ്ക് മാത്രം കോടതിയിൽ നൽകിയ ഇര കള്ളം പറയുകയാണെന്ന് കോടതി

👉ഇര സാക്ഷികളും സാഹപ്രവർത്തകരുമായ സിസ്റ്റർമാരോട് താൻ 13 തവണ ബലാത്സംഗത്തിന് ഇരയായി എന്ന കാര്യം പറഞ്ഞിട്ടുണ്ട് എന്ന വാദം നുണയാണെന്ന് കോടതിയിൽ തെളിഞ്ഞു.

👉സഭയിൽ നിന്നും പുറത്തുപോകുന്നു എന്ന് ചൂണ്ടിക്കാണിച്ച് നൽകിയ 2017 ലെ കത്തിലും പീഡനത്തേക്കുറിച്ച് പറയുന്നില്ല.

👉ഇര ബിഷപ്പ് കുര്യൻ വലിയകണ്ടത്തിലിനോട് പറഞ്ഞതും പ്രതി അയാളുമായി കിടക്ക പങ്കിടാത്തതിന്റെ പകയിൽ തനിക്കെതിരെ പ്രതികാര നടപടികൾ കാണിക്കുന്നു എന്നതാണ്. തന്നെ ബലാത്സംഗം ചെയ്തു എന്നല്ല എന്ന് ആറാം സാക്ഷികൂടിയായ ബിഷപ്പ് കുര്യൻ വെളിപ്പെടുത്തി.

👉കർദിനാൾ മാർ ജോർജ്ജ് ആലഞ്ചേരിയോടും ഇര നൽകിയ പരാതിയിൽ പറഞ്ഞത് പ്രതിയായ ബിഷപ്പ് തനിക്ക് ലൈംഗിക ചുവയുള്ള അശ്ലീല മെസേജുകളും, ശബ്ദങ്ങളും അയക്കുന്നു എന്നതാണ്. ലൈംഗിക അതിക്രമം നടന്നു എന്ന് ആ പരാതിയിലും പറയുന്നില്ല. ഇക്കാര്യം പതിനെട്ടാം സാക്ഷിയായ കർദിനാൾ മാർ ആലഞ്ചേരി കോടതിയിൽ വ്യക്തമാക്കി

👉കർദിനാൾ മാർക്കിന്‌ 2018 ൽ അയച്ച പരാതിയിലും ഒരു പ്രാവശ്യം പീഡിപ്പിച്ചു എന്നാണ് പറയുന്നത് 13 എന്ന മൊഴി ഇല്ല.

👉ജില്ല പോലീസ് മേധാവിക് നൽകിയ പരാതിയിൽ പീഡനം നടന്നു എന്ന് മാത്രമാണ് പറഞ്ഞിട്ടുള്ള മറ്റ് വിവരങ്ങൾ ഇല്ല

👉Penile pentratiton (യോനിയിൽ ലിംഗം പ്രവേശിപ്പിച്ചുള്ള ലൈംഗിക ബന്ധം ) നടന്നിട്ടില്ല എന്ന ഇരയുടെ മൊഴിയും, 37 ആം സാക്ഷിയായ മൊഴി രേഖപെടുത്തിയ വനിത പോലീസ് ഓഫീസർക്കെതിരെയുള്ള ഇരയുടെ മൊഴിയും തെറ്റാണെന്ന് തെളിഞ്ഞു.

👉പീഡനം നടന്നതിന്റെ തൊട്ടടുത്ത ദിവസം പ്രതിയോടൊപ്പം ഏറെ ദൂരം ഒരുമിച്ച് കാറിൽ സഞ്ചരിക്കുകയും, വിവിധ പരിപാടികളിൽ പങ്കെടുക്കുകയും ചെയ്തു.

👉ഇനി കോൺവെന്റിൽ വരാൻ അനുവദിക്കില്ല എന്ന് ഇര പ്രതിക്ക് മെസേജ് അയച്ച ശേഷം കേരളത്തിൽ ഉണ്ടായിട്ടും കോൺവെന്റിൽ വരാതെ പോയ പ്രതി “ഞാൻ കുറുവിലങ്ങാടിലൂടെ കടന്നു പോകുകയാണ് ” എന്ന് മെസേജ് അയച്ചു എന്ന മൊഴി പ്രോസിക്കൂഷൻ വാദങ്ങൾക്ക് വിരുദ്ധമാണ് എന്ന് കണ്ടെത്തി

👉ഇരയുടെ 164 രഹസ്യ മൊഴി പ്രകാരം പ്രതി ഇരക്ക് അയച്ച മെസേജിൽ ” ഞാൻ നിന്റെ തീരുമാനത്തിനോടൊപ്പം ഹൃദയപൂർവ്വം ചേരുകയാണ് , എനിക്ക് നിന്നെ കാണണം, എനിക്ക് നിന്നെ വേണം, എന്നെ വിളിക്കൂ ” ‘with heavy heart I am joining with your decision’. ‘I want to see you, I want to need you, call
me’.
എന്നാണ് ഉള്ളത്. അതിൽ നിന്നുതന്നെ ഏതെങ്കിലും തരത്തിലുള്ള ഭീഷണിയോ, ബലമായുള്ള ഭീഷണിപ്പെടുത്താലോ ഈ സന്ദേശങ്ങളിലില്ല എന്ന് വ്യക്തം.

👉കസിൻ ഭർത്താവുമായുള്ള ഇരയുടെ രഹസ്യ ബന്ധത്തിനെതിരെ കസിൻ പരാതി നൽകിയ ശേഷമാണ് ഇര ആദ്യമായി പീഡന ആരോപണം ഉന്നയിക്കുന്നത് എന്നത് സംശയസ്പദമാണ്.

👉പരാതി നൽകാനുള്ള ഇരയുടെ 2 വർഷത്തെ കാലതാമസം വിശദീകരിക്കാൻ പ്രോസിക്കൂഷന് കഴിഞ്ഞെങ്കിലും ബാക്കി രണ്ട് വർഷത്തെ കാല താമസം വ്യക്തമായിട്ടില്ല.

👉സിസ്റ്റർ ടിൻസിയെ മദർ സുപ്പീരിയർ ആക്കിയത് ഇരക്കും, ഒപ്പമുള്ള മറ്റ് സിസ്റ്റർമാർക്കും താല്പര്യം ഉണ്ടായിരുന്നില്ല.അതുകൊണ്ട്തന്നെ ഇര സിസ്റ്റർ ടിൻസിക്കെതിരെ പരാതി നൽകിയിരുന്നു.

👉കോൺവെന്റിലെ അന്തേവാസികൾക്ക് ഇടയിൽ കടുത്ത പ്രശ്നങ്ങൾ നിലനിന്നിരുന്നു. ഇരയുടെ നേതൃത്വത്തിൽ പ്രത്യേക ഗ്രൂപ്പുകളായി പ്രശ്നങ്ങൾ നിലനിന്നിരുന്നു എന്നും അന്വേഷണ കമ്മീഷൻ കണ്ടെത്തിയിരുന്നു.

👉ഇരക്ക് സീറോ മലബാർ സഭയിൽ ചേരാൻ ആഗ്രഹം ഉണ്ടായിരുന്നതായി കർദിനാൾ മാർ അലഞ്ചേരിയുടെയും, ഇരയുടെയും മൊഴികളിൽ സ്ഥിതീകരിക്കുന്നു.

👉ഇരയും 3,4,22 എന്നീ സാക്ഷികളായ സിസ്റ്റർമാരും പള്ളിക്ക് മുൻപാകെ ചില നിബന്ധനകൾ വെച്ചിരുന്നു. കോൺവെൻറ് ബീഹാർ രൂപതക്ക് കീഴിൽ കൊണ്ടുവരണമെന്നതായിരുന്നു പ്രധാന ആവശ്യം ഈ ആവശ്യം അംഗീകരിച്ചിരുണെങ്കിൽ എല്ലാ പ്രശ്നങ്ങളും ഒത്തുതീർക്കാൻ അവർ തയ്യാറായിരുന്നു. ആവശ്യങ്ങൾ നിഷേധിച്ചപ്പോഴാണ് പരാതി നൽകിയത്.

👉നിർണ്ണായകമായത് മാധ്യമ പ്രവർത്തകൻ അഭിലാഷ് മോഹനന്റെ നാലാം സാക്ഷി അനുപമയുമായുള്ള ടിവി ഇന്റർവ്യൂ.

👉രണ്ടാം സാക്ഷി ഉൾപ്പെടെ എല്ലാ സാക്ഷികളുടെയും മൊഴികളിൽ വൈരുധ്യം.

👉ഫ്രാങ്കോ ബിഷപ്പും ഇരയും തമ്മിൽ നല്ല സൗഹൃദപരമായ ബന്ധമാണെന്ന് ഇമെയിൽ സംഭാഷണങ്ങൾ ഉൾപ്പെടെ നിരത്തി കോടതിയിൽ തെളിയിക്കാൻ സാധിച്ചു.(സംഭാഷണം കോടതി വിധിയിൽ )

👉ഇര പ്രതിക്ക് അയച്ച ഒരു സന്ദേശം ഇങ്ങനെ“dear lordship good afternoon, Now I understood howmuch love and concern you have for mj”ssssssss, you r too late to update….just now I have seen and replied u,how is ur health, work, mission, vision, etc……takecare of mj’s too who is in and out, I mean those who rout…for studies…..praying for u, thank u……..”

ഫ്രാങ്കോ ബിഷപ്പ് ഇരക്ക് അയച്ചത് ഇങ്ങനെ “oh my dear only today I saw the pictures. Beautiful.Please reply when you see this mail. thank you.”

👉ഇരക്ക് സ്വന്തം കസിന്റെ ഭർത്താവും സുപ്രീംകോടതി അഭിഭാഷകനുമായ ആളുമായി ബന്ധമുണ്ടെന്നുള്ള പ്രതിഭാഗം ആരോപണം കോടതിയിൽ നിർണ്ണായകമായി. ഇവർ തമ്മിൽ ബന്ധപ്പെട്ടപ്പോഴാകാം കന്യകത്വം നഷ്ടമായത് എന്ന പ്രതിഭാഗം വാദം തള്ളിക്കളയാൻ സാധിക്കില്ലെന്ന് കോടതി.

👉തന്റെ ഭർത്താവുമായി ഇര ലൈംഗിക ബന്ധത്തിൽ ഏർപ്പെടുന്നത് കണ്ടു എന്നും അഭിഭാഷകനായ ഭർത്താവ് ആത്മഹത്യക്ക് ശ്രമിച്ചു എന്നും, അശ്ലീല സന്ദേശങ്ങൾ ഇരുവരും കൈമാറിയിട്ടുണ്ടെന്നുമുള്ള കസിന്റെ ആരോപണം നിർണ്ണായകമായി.

👉തന്റെ ഭർത്താവുമായി ഇരക്ക് അവിഹിത ബന്ധമുണ്ടെന്ന് കാണിച്ച് കസിൻ സഭക്ക് നൽകിയ പരാതിയും അതിലെ ആരോപണങ്ങളും, പരാതി ഇതുവരെ പിൻവലിക്കാത്തതും നിർണ്ണായകമായി.

👉ഇരയുമായി അവിഹിത ബന്ധം ആരോപിക്കപ്പെടുന്ന സുപ്രീംകോടതി വക്കീലിനെ പ്രോസിക്കൂഷൻ വിസ്തരിക്കാത്തത് അത്ഭുമാണെന്ന് കോടതി.

👉പ്രതി തന്നെ penile Penetration
(യോനിയിൽ ലിംഗം പ്രവേശിപ്പിച്ചുള്ള ലൈംഗിക ബന്ധം )നടത്തി പീഡിപ്പിച്ചെന്ന് രഹസ്യമൊഴിയിലോ, ഫസ്റ്റ് ഇൻഫോർമേഷൻ സ്റ്റേട്ട്മെന്റിലോ ഏതെങ്കിലും പരാതികളിലോ ഇര പറഞ്ഞിട്ടില്ലെന്ന് പ്രതിഭാഗം സംശയതീതമായി തെളിയിച്ചു.

👉പ്രതി തന്നെ penile penetration (യോനിയിൽ ലിംഗം പ്രവേശിപ്പിച്ചുള്ള ലൈംഗിക ബന്ധം )നടത്തി പീഡിപ്പിച്ചില്ല എന്ന കാര്യം ഇര പ്രത്യേകം ഡോക്ട്ടറോട് വെളിപ്പെടുത്തിയ കാര്യം മെഡിക്കൽ റിപ്പോർട്ടിൽ നിന്നും മായ്ച്ചു കളഞ്ഞു എന്നത് കോടതിയിൽ തെളിയിക്കപ്പെട്ടത്തോടെ പ്രോസിക്കൂഷന്റെ കേസ് പൂർണ്ണമായും ഇല്ലാതെയായി.

👉മെഡിക്കൽ റിപ്പോർട്ടിന്റെ ഒർജിനൽ കാർബൺ കോപ്പി കോടതിയിലെത്തിയപ്പോൾ ചീട്ട് കൊട്ടാരം പോലെ പൊളിഞ്ഞത് പ്രോസിക്കൂഷൻ ആരോപണങ്ങൾ
“Victim a resident of St. Francis Mission Homesince 2013. History of multiple sexual assault byBishop (FrancoMulackal) who was occasionalvisitor at the convent Home. The history of assaultmultiple times 13 times ie., in 4 year period.Assault including touching of private parts, inserting his fingers in victim’s vagina, forces her totouch his private parts and ejaculation in front ofher. No history of penetrative sex according tothe victim. Last episode one year back.”

👉ഇതിൽ ‘No history of penetrative sex according tothe victim “(യോനിയിൽ ലിംഗം പ്രവേശിപ്പിച്ചുള്ള ലൈംഗിക ബന്ധം നടന്നിട്ടില്ല )എന്ന ഇര ഡോക്ട്ടർക്ക് നൽകിയ മൊഴിയുടെ ഭാഗമാണ് മായ്ച്ചു കളഞ്ഞ മെഡിക്കൽ റിപ്പോർട്ട് പ്രോസിക്കൂഷൻ കോടതിയിൽ നൽകിയത്. കാർബൺ കോപ്പിയിൽ നിന്നും കോടതി യാഥാർഥ്യം മനസിലാക്കി ഡോക്റ്ററെ വിസ്‌തരികുകയായിരുന്നു.

👉ഇരയ്ക്ക് ബന്ധമുണ്ടെന്ന് ആരോപിക്കപ്പെടുന്ന കസിന്റെ ഭർത്താവായ സുപ്രീംകോടതി വക്കീൽ ഇരയുടെ കോൺവെന്റിൽ എത്തി അഞ്ച് ദിവസം താമസിച്ചു എന്നതും ആ സമയത്ത് ഇരുവരും ഒരുമിച്ചുണ്ടായപ്പോൾ പാതിരാത്രി 1 മണിക്ക് ഫ്രാങ്കോ ഇരയുടെ മൊബൈലിൽ “എന്താ മാഷേ ” എന്ന് മെസേജ് അയച്ചു എന്നുമൊക്കെയുള്ള ഭാര്യയുടെ പരാതിയിലെ ആരോപണങ്ങൾ നിർണ്ണായകമായി.

👉അഭിലാഷ് മോഹനന്റെ ഇന്റർവ്യൂ എഡിറ്റഡ് ആണ് എന്ന അനുപമയുടെ മൊഴി വ്യാജ മൊഴിയാണെന്ന് തെളിയിക്കാൻ പ്രതിഭാഗത്തിന് സാധിച്ചു.

👉ബിഷപ്പ് ഇരയായ കന്യസ്ത്രീയെ കൂടെ കിടക്കാൻ നിർബന്ധിക്കുകയാണ് എന്ന് ടാക്സി ഡ്രൈവറോട് വെളിപ്പെടുത്തി എന്ന മൂന്നാം സാക്ഷിയുടെ വെളിപ്പെടുത്തൽ വിശ്വാസ യോഗ്യമല്ലെന്നും PW5 കള്ളസക്ഷിയാണെന്ന് കോടതി നിരീക്ഷിച്ചു.

👉സാക്ഷികളായ ഒരു സിസ്റ്റർമാരോടും തന്നെ പ്രതി പീഡിപ്പിച്ചെന്ന് ഇര വെളിപ്പെടുത്തിയിട്ടില്ല എന്ന് തെളിയിക്കാൻ പ്രതി ഭാഗത്തിന് സാധിച്ചു.

👉പ്രോസിക്കൂഷൻ കോടതിയിൽ സമർപ്പിച്ച ഭൂരിപക്ഷം ഡിജിറ്റൽ തെളിവുകൾക്കും നിയമപ്രകാരമുള്ള സർട്ടിഫിക്കറ്റുകളും, നിയമനുസൃത വസ്തുതകലുമില്ലാത്തതിനാൽ കോടതി അഡ്മിറ്റ് ചെയ്തില്ല

👉ബിഷപ്പ് പീഡിപ്പിച്ചു എന്നാരോപിക്കുന്ന കോൺവെന്റിലെ ഒന്നാം നിലയിലെ 20 നമ്പർ മുറിയുടെ അടുത്താണോ, ആ ഫ്ലോറിൽ എവിടെയാണ് ഇരയുടെ റൂം എന്നുപോലും അന്വേഷിക്കുകയോ കണ്ടെത്തുകയോ തെളിയിക്കാനോ പ്രോസികൂഷനോ പോലീസിനോ കഴിഞ്ഞില്ലെന്ന് കോടതി.

👉ഇര താമസിച്ച റൂം വ്യക്തമായി പറയാൻ പോലും സാക്ഷികൾക്ക് സാധിച്ചില്ല. വൈരുധ്യമാർന്ന മൊഴികളാണ് സാക്ഷികൾ നൽകിയത്.

👉പീഡിപ്പിച്ചു എന്ന് പറയപ്പെടുന്നതിന്റെ തൊട്ടടുത്ത ദിവസത്തെ വീഡിയോകളിലും, ചിത്രങ്ങളിലും ഇര പ്രതിയോടൊപ്പം, ഭക്ഷണങ്ങൾ വിളമ്പി നൽകിയ മറ്റും സന്തോഷത്തോടെ കാണപ്പെട്ടു എന്ന പ്രതിഭാഗം വാദം വലിയ പരിധിവരെ നിർണ്ണായകമായി

👉പ്രതിയായ ബിഷപ്പിന്റെ അശ്ലീല മെസേജുകളും, കോളുകളും ഫോണിലുണ്ടെന്ന് ആരോപിച്ചെങ്കിലും ഫോൺ ആക്രികടയിൽ കൊടുത്തെന്നും, ലാപ്ടോപ്പ് തകരാറിലായി എന്നുമൊക്കെയുള്ള ഇരയുടെ മൊഴി കള്ളമാണെന്ന് കോടതി കണ്ടെത്തി. ബലാത്സംഗ ആരോപണങ്ങളും മൊഴികളും സാധൂകരിക്കാൻ ഇവയിൽ എന്തെങ്കിലും നൽകാൻ പ്രോസിക്കൂഷന് സാധിക്കണമായിരുന്നു എന്ന് കോടതി സഹതപിച്ചു.

👉ഇരക്ക് കസിന്റെ ഭർത്താവുമായി ഫോണിലൂടെ നിരന്തര ബന്ധം ഉണ്ടായിരുന്നു എന്ന ആരോപണം സ്ഥിതീകരിക്കാൻ കസിന്റെയും വക്കീലായ ഭർത്താവിന്റെയും ഫോണുകൾ ആവശ്യപ്പെട്ടെങ്കിലും രണ്ടാളും കള്ളത്തരങ്ങൾ പറഞ്ഞു ഫോണുകൾ നൽകാത്തത് കോടതിക്ക് സംശയത്തിന് ഇട നൽകി.

👉നെല്ലും പതിരും തിരിച്ചറിയാൻ പറ്റാത്തവിധമുള്ള കേസിൽ ഇര എന്തൊക്കൊയോ വസ്തുതകൾ മറക്കാൻ ശ്രമിക്കുന്നു എന്ന് കോടതിക്ക് ബോധ്യപ്പെടുകയും, കേസിൽ സാക്ഷി മൊഴികളെ സധൂകരിക്കാനോ തെളിയിക്കാനോ പ്രോസിക്കൂഷന് സാധിക്കാതെ വരികയും ചെയ്തിരിക്കുന്നു. അതുകൊണ്ടുതന്നെ ഇരയുടെ മൊഴിയെ മാത്രം അടിസ്ഥാനപ്പെടുത്തി പ്രതിയെ ശിക്ഷിക്കാൻ ഈ കേസിൽ സാധ്യമല്ലെന്നും കോടതി നിരീക്ഷിക്കുന്നു.

👉ആയിരം കുറ്റവാളികൾ രക്ഷപ്പെട്ടാലും ഒരു നിരപരാധി പോലും ശിക്ഷിക്കപ്പെടരുത് എന്ന ക്രിമിനൽ നിയമ വിചാരണ തത്വത്തിലാണ് നിന്നുമാണ് കോടതി വിധി വെയിറ്റേജ് നൽകിയിരിയുന്നത് എന്ന് കാണാം.

ഒരു വിചാരണ കോടതി ജഡ്ജ് തന്റെ മുമ്പിലെത്തിയ തെളിവുകളെയും സാക്ഷികളെയും, മൊഴികളെയും പൊതുബോധത്തിന്റെ വക്കാലത്ത് ഇല്ലാതെ നിക്ഷ്പക്ഷവും നിയമപരമായും വിലയിരുത്തിയിരിക്കുന്നു എന്നത് നിയമവാഴ്ചയുടെ കണ്ണിൽ പ്രസക്തവും അഭിനന്ദമാർഹവുമാണ്. അതേ സമയം ഇരയാക്കപ്പെട്ട സ്ത്രീക്ക് നേരിട്ട ആക്രമണവും അതിലെ തീരാ വേദനയും, നീതിയും ഇപ്പോഴും ബാക്കിയാണ് എന്നതും വേദനജനകമാണ്.

വിധിക്കെതിരെ നിയമപരമായി അപ്പീലുകൾ നൽകാനുള്ള അവകാശം ബാക്കി നിൽക്കേ കേസിൽ കൂടുതൽ നിയമ പോരാട്ടങ്ങൾക്കും, നിയമ വ്യാഖ്യാനങ്ങൾക്കും വാതിലുകൾ തുറന്നിരിക്കുകയാണ്.

മുൻവിധികളില്ലാതെ നീതി നടപ്പിലാകും എന്ന് പ്രത്യാശിക്കട്ടെ….

അഡ്വ ശ്രീജിത്ത്‌ പെരുമന
Adv Sreejith Perumana

Advertisements

ഓലച്ചൂട്ടുകൾ

ഓലച്ചൂട്ടുകൾ
——————————————-

🖋 സലിം പടിഞ്ഞാറ്റുംമുറി
——————————————-

Old age 2

“ഈശ്വരാ… കാത്തോളണേ…”

ചുക്കിച്ചുളിഞ്ഞ കൈൾ ബെഡിൽ കുത്തി അയാൾ എണീറ്റിരുന്നു.

അന്നും കിടക്കയിൽ നനവു കണ്ടപ്പോൾ അയാളുടെ കണ്ണുകളും നനഞ്ഞു.

ആത്മനിന്ദയോടെ അയാൾ നെഞ്ചൊന്നു തടവി ഭാര്യയെ നോക്കി.

“ഞാൻ നെന്നോട് ഒര് കാര്യം പറയാൻ പോകുവാണ് .. …യ്യ് എതിരൊന്നും പറയര്ത്…”

ശ്വാസം എടുക്കാൻ പാടുപെട്ടു കൊണ്ട്….

” ന്റെ കുഞ്ഞുങ്ങളെ ഒന്നിനും ബുദ്ധിമുട്ടിച്ചിട്ടില്യാ ഇക്കാലം വരെയായിട്ട് .. ഇനി ഈ വയസ്സാംകാലത്ത് അച്ഛൻ ഒര് ബാധ്യതയായീന്ന് അവർക്ക് തോന്നാൻ പാടില്യാ… അതോണ്ട് … അതോണ്ട് ഞാനൊര് തീര്മാനമെട്ത്തിരിക്ക്യാണ് … “

അപ്പൂപ്പാ… ദെന്താ അപ്പൂപ്പൻ അമ്മൂമ്മടെ ഫോട്ടോ നോക്കി പിച്ചും പേയും പറയണത്..!!.?”

കൊച്ചുമകൾ അപ്പൂപ്പന്റെ ബെഡിലിരിക്കവേ

” മോള് അച്ഛനേം അമ്മയേം ഒന്ന് വിളിച്ചോണ്ട് വാ…”

“ശരിയപ്പൂപ്പാ…”

അയാൾ മകനേയും മരുമകളേയും അടുത്തിരുത്തി പതുക്കെ വിഷയം അവതരിപ്പിച്ചു.

അമ്മയും മകളും ഒരു നിമിഷം അമ്പരന്നു പോയി.!

“അച്ഛാ… പറയണത് കേട്ടോ…? ഈ വൃദ്ധസദനം ന്നൊക്കെ പറഞ്ഞാ എന്താന്നാ അപ്പൂപ്പൻ വിചാരിച്ചേ..?”

“അവടെ അങ്ങനെ വല്യ പ്രശ്നൊന്നുംല്യ കുട്ട്യേ… മ്മടെ നാരയണനേം ഭാർഗ്ഗവനേം ഒക്കെ മക്കള് അവടെത്തന്നെയല്ലേ കൊണ്ടാക്കീര്ക്ക്ണേ… അവർക്കൊക്കെ അവടെ സൊഖാ …”

“അച്ഛനെന്തൊക്കെയാ ഈ പറയണതച്ഛാ…”

മരുമകൾക്ക് ഉള്ളു നൊന്തു .

“മോളെന്തിനാ പേടിക്കണത്… ദാ അതിവടെ തൊട്ടടുത്ത് തന്നെയല്ലേ… നിങ്ങക്ക് എപ്പളും വന്ന് കാണാല്ലോ…. “

മകൻ അപ്പോഴും എല്ലാം കേട്ടിരിക്കുകയാണ്.

“അപ്പൂപ്പനെന്തായിപ്പോ ഇങ്ങനൊക്കൊ തോന്നാൻ ഇണ്ടായേ…?”

“ഒന്നൂല്യാ…”

മരുമകൾ അച്ഛന്റെ കട്ടിലിലിരുന്നു.

“പറ അച്ഛാ.. എന്തേ..? എന്താ അച്ഛന് പറ്റിയേ..?”

“ഏയ് ഒന്നൂല്യാ മോളേ… എന്തോ കൊറച്ച് ദെവസായി ഒറക്കം ഒന്നും ശരിക്കങ്ങട് കിട്ടണില്യാ.. ഒര് പേടി പോലെ … ഒറ്റയ്ക്ക് കെടക്കുമ്പോ ഓരോ ചിന്തകളാ… അത് മാത്രല്ലാ… നാലഞ്ച് ദെവസായി കെടക്കേല് അറിയാണ്ട് മൂത്രം പോകാനും തൊടങ്ങീര്ക്ക്ണു …. ഇനി കൊറച്ചൂടെ കഴിഞ്ഞാ…. അതാ ഞാൻ പറഞ്ഞത്…”

അയാൾ മകനെയൊന്നു നോക്കി.

ഒന്നു ദീർഘനിശ്വാസമുതിർത്ത ശേഷം മകൻ എണീറ്റു.

” അച്ഛൻ പോകാൻ തന്നെ തീരുമാനിച്ചോ …? “

“അതേടാ … അതാ നല്ലത്… എത്രേം നേർത്തെയായാ ന്റെ കുട്ട്യോൾക്ക് അത്രേം ബുദ്ധിമ്മുട്ട് കൊറയോല്ലോ…”

മകൻ എന്തൊക്കെയോ തീരുമാനിച്ചുറച്ചു.

” അമ്മൂ… അപ്പൂപ്പന്റെ മര്ന്നും കൊഴമ്പും രാമായണോം ഒക്കെ എടുക്ക്…
( ഭാര്യയോട് )
അച്ഛന്റെ കെടക്കേം വിരിപ്പുമെല്ലാം മടക്കിക്കെട്ട് …”

പകപ്പോടെ അവർ അയാളെ നോക്കി മടിച്ചു നിൽക്കവേ അയാൾ തന്നെ അതെല്ലാം എടുത്തു.

അച്ഛനോട് : “എണീക്ക്.. “

അയാൾ അതെല്ലാം സ്വന്തം ബെഡ് റൂമിൽ കൊണ്ടിട്ടു.

അമ്പരപ്പോടെ അച്ഛൻ:

” എന്തേ … എന്തിനാ ഇവ്ടെ കൊണ്ടിട്ടത്….!!!?

“അച്ഛനിനി ഇവിടെ…. എന്റട്ത്താ കെടക്ക്ണത്…”

“മോനേ….!!

“മിണ്ടരുത് …”

അയാളുടെ ശബ്ദമുയർന്നു.

സൗമ്യനായ മകന്റെ കണ്ണുകളിൽ അതു വരെ കാണാത്ത രോഷം കണ്ടപ്പോൾ അച്ഛൻ ഭയന്നു.

“നാല്‌ദെവസം ബെഡില് മൂത്രമൊഴിച്ചൂന്നും പറഞ്ഞ് വൃദ്ധസദനം തെരഞ്ഞ് നടക്ക്ണൂ … നാല് വയസ്സുവരെ ഞാനും ബെഡില് മൂത്രമൊഴിച്ചിരുന്നില്ലേ…?അന്നെന്തേ സദനങ്ങളും മന്ദിരങ്ങളും ഒന്നും ണ്ടായിര്ന്നില്ലേ…?”

“എടാ അച്ഛൻ പറഞ്ഞത് – “

“കേൾക്കണ്ടാ എനിക്ക് … നാരായണനും ഭാർഗ്ഗവനും ഒക്കെ അവടെയാത്രേ… സ്വർഗ്ഗല്ലേ അവടെ … സ്വർഗ്ഗം … “

അയാൾ കിതച്ചു.

സങ്കടം അയാളുടെ ഉള്ളിനെ ഉഴുതുമറിച്ചു.

” ഇനിക്കൊര് തെറ്റ് പറ്റി…
ന്റച്ഛന് വയസ്സായത് ഞാൻ കണ്ടില്യാ.. കാണാൻ ശ്രമിച്ചില്യാ … അത് ഇന്റെ കുറ്റല്ലാ … ( വിതുമ്പിക്കൊണ്ട് )ന്റെ അച്ഛന് പ്രായായി കാണാൻ ഇനിക്ക് പറ്റാത്തോണ്ടാ…”

ഇനിയും അവിടെ നിന്നാൽ തന്റെ നെഞ്ച് പൊട്ടിപ്പോകുമെന്നറിഞ്ഞ് നിറകണ്ണുകൾ മറ്റുള്ളവർ കാണാതിരിക്കാൻ അയാൾ ഇറങ്ങിപ്പോയി.

ആ പോക്കു നോക്കി നിൽക്കവേ അച്ഛനും സങ്കടമൊതുക്കാൻ പാടുപെട്ടു.

“ന്റെ കുട്ടിക്ക് വെഷമായോ ആവോ..?”

അച്ഛന്റെ അടുത്തു വന്നിരുന്ന്, ചുളിവു വന്ന ആ കൈകൾ തഴുകിക്കൊണ്ട് മരുമകൾ:

“അച്ഛാ… ഒര് കാര്യം ചോദിച്ചോട്ടെ…?”

അയാൾ അവളുടെ മുഖത്തേക്കു നോക്കി.

“നന്ദേട്ടനും ഇവളും തരുന്ന സ്നേഹത്തിന് എന്തെങ്കിലും കുറവ് തോന്നിത്തുടങ്ങിയോ അച്ഛന് ..? അതോ എന്നെ ഒരു മരുമകളായിത്തന്നെ കാണാൻ തുടങ്ങിയോ…? എന്തു പറ്റി അച്ഛന് ..?”

അവളുടെ ശിരസ്സിൽ അരുമയോടെ ഒന്നു തഴുകിയ ശേഷം അയാൾ:

” ഇല്ല കുഞ്ഞേ… നിങ്ങൾടെയൊക്കെ സ്നേഹം കൂടുതലായേ തോന്നീട്ട് ള്ളൂ അച്ഛന് …

അതല്ല … മനസ്സൊക്കെ പിടി വിട്ടു പോകണപോലെ തോന്നണു ചെലപ്പോ … ആരാന്നോ എന്താന്നോ ഒന്നും അറിയ്ണില്യാ… ഓർമ്മ നഷ്ടപ്പെടണ പോലെ… “

കൊച്ചുമകൾ അയാളുടെ കരം കവർന്നു.

“എന്റെ അപ്പൂപ്പാ… അപ്പൂപ്പനെന്തിനാ പേടിക്കണത്… അപ്പൂപ്പന്റെ ഓർമ്മക്കല്ലേ മങ്ങലൊള്ളൂ… ഞങ്ങൾക്ക് ഓർമ്മയിണ്ടല്ലോ… ഞങ്ങക്കറിയാല്ലോ ഇത് ഞങ്ങടെ അപ്പൂപ്പനാണെന്ന്… പിന്നെന്താ …? “

അയാളുടെ കണ്ണു നിറഞ്ഞു.
വിറയ്ക്കുന്ന കരം കൊണ്ട് അവളുടെ താടിയൊന്ന് പിടിച്ച്:

” ന്റെ നന്ദന്റെ മോള് തന്നെ… “

മരുമകൾ:
“അച്ഛാ.. എന്തേ ഇപ്പൊ കിട്ടണതിന്റെ നലെരട്ടി ശമ്പളം കിട്ടണ കാനഡേലെ ജോലി വേണ്ടാന്ന് വെച്ച് പോന്നത് ന്ന് ചോദിച്ചപ്പോ അച്ഛന്റെ മോൻ പറഞ്ഞതെന്താന്നറിയോ…? അവടെ ശമ്പളല്ലേ കൂടുതലൊള്ളൂ… ന്റെ അച്ഛനില്യല്ലോന്ന്… ന്ന്ട്ട് ആ മോനോട് എങ്ങനെ പറയാൻ തോന്നിയച്ഛാ ഇങ്ങനെയൊക്കെ…?”

“ന്നെയിങ്ങനെ സങ്കടപ്പെട്ത്തല്ലെ കുട്ട്യേ…
അവന്റെ ആഗ്രഹങ്ങളൊന്നും സാധിപ്പിച്ച് കൊട്ക്കാൻ ഈ അച്ഛന് കഴിഞ്ഞിട്ടില്ലെങ്കിലും വെഷമിപ്പിച്ചിട്ടില്യാ അവനെ ഒര് കാര്യത്തിലും … ഇനി ഈ വാർദ്ധക്യത്തില് അച്ഛൻ അവനൊര് ബുദ്ധിമുട്ടാവണ്ടാന്ന് കര്തി പറഞ്ഞതാ… പാവാ ന്റെ കുട്ടി…… “

പിന്നിലൂടെ അപ്പൂപ്പനെ കെട്ടിപ്പിടിച്ച ശേഷം കൊച്ചുമകൾ:

“അപ്പൂപ്പാ… ഈ വാർദ്ധക്യംന്ന് പറയണത് ഒര് അസുഖല്ല… അതൊരവസ്ഥയല്ലേ… കുട്ടിക്കാലത്തിലേക്കുള്ള ഒര് തിരിച്ചു പോക്ക് … അച്ഛനേം രേവമ്മായിയേം അപ്പൂപ്പനെ ഏൽപ്പിച്ച് അമ്മൂമ്മ മരിക്കുമ്പോ അവര് രണ്ടു പേരും തീരെ ചെറിയ കുട്ട്യോളായിര്ന്നില്ലേ… അന്ന് അവരൊര് ബാധ്യതയായി തോന്നിയോ അപ്പൂപ്പന്…? എവടേങ്കിലും കൊണ്ട് ചെന്ന് കളയാൻ തോന്നിയോ…?
അവരെ അച്ഛന്റേം അമ്മേടേം സ്നേഹവും ജീവനും കൊട്ത്ത് ഇത്രേം വളർത്തീലേ അപ്പൂപ്പൻ …? ആ അപ്പൂപ്പനെ എവടേങ്കിലും കൊണ്ടോയി തള്ളാൻ ഇന്റച്ഛൻ സമ്മതിക്ക്വോ..?”

അയാളെ ഒന്നു കൂടെ പുണർന്ന ശേഷം:

” ഞാനും ന്റെ അമ്മയും പൊന്നുപോലെ നോക്ക്വോലോ ന്റെ അപ്പൂപ്പനെ… ല്ലേ അമ്മേ…?”

വെളിച്ചം മങ്ങിത്തുടങ്ങിയ കണ്ണുകളിൽ നിന്നും രണ്ടിറ്റു കണ്ണുനീർ അവളുടെ ഇളം കൈത്തണ്ടയിൽ വീണു നനഞ്ഞു.

O O O

“സാരംല്യേട്ടാ… എന്നേക്കാൾ ഏട്ടനറിയണതല്ലേ അച്ഛനെ … ഏട്ടനോട്ള്ള സ്നേഹം കൊണ്ട് പറഞ്ഞതാ അച്ഛൻ …… വെഷമിക്കണ്ട…. “

പൂമുഖത്തെ കസേരയിൽ ഇരുട്ടിലേക്കു നോക്കി ഉള്ളു തകർന്നിരിക്കവേ അയാളുടെ കണ്ണുകളിലെ നനവ് പിന്നിൽ വന്നു നിന്ന അവളുടെ വിരലുകൾ തൊട്ടറിഞ്ഞു.

“അമ്മ പോയ രണ്ടാം വയസ്സില് മുലപ്പാല് മതിയാകാണ്ട് കരച്ചില് തൊടങ്ങിയ ന്റെ രേവൂന്റെ കണ്ണീർച്ചാലുകൾ ഇപ്പളും കാണാം അച്ഛന്റെ തോളില് …. പക്ഷേ ഇത്രേം കാലം വരെയായിട്ട് അച്ഛനെന്നെ കരയിച്ചിട്ടില്യാ …. ഇപ്പോ …”

(അയാളുടെ വാക്കുകൾ തൊണ്ടയിൽ തടഞ്ഞു)

സമാധാനിപ്പിക്കാനെന്നവണ്ണം അവൾ അയാളുടെ മുടിയിഴകളിൽ തലോടിക്കൊണ്ടിരുന്നു.

“അച്ഛന്റെ കണക്ക് പുസ്തകത്തിൽ ഒന്നുംണ്ടാവില്യാ … ഞങ്ങളെ നോക്കിയതും വളർത്തിയതും ഒന്നും .. പക്ഷേ ഞാനതെല്ലാം എഴുതി കാണാണ്ട് പഠിച്ചു വെച്ചിട്ടുണ്ട് … എന്തിനെന്നോ…? ഇവിടെയും ഒന്ന് വളര്ണുണ്ടല്ലോ.. പഠിപ്പിച്ചു കൊട്ക്കാൻ … “

“അച്ഛനെ പറഞ്ഞിട്ട് കാര്യം ല്യാ ഏട്ടാ.. എടുത്താ പൊങ്ങാത്ത ഭാരം ചുമലിലും തലേലും ചുമന്ന് നട്ടെല്ല് തകർത്ത സമ്പാദ്യം കൊണ്ട് മക്കളെ വളർത്തി വല്താക്കിവിട്ടിട്ട് ഒടുക്കം ഒന്നിനും വയ്യാണ്ടാകുമ്പോ ആ മക്കള് തന്നെയല്ലേ അവരെ എവടേങ്കിലും ഒക്കെ കൊണ്ട് ചെന്ന് തള്ളാറ് …”

നിറഞ്ഞ കണ്ണുകൾ അമർത്തിത്തുടച്ച് അയാൾ എണീറ്റു.

സ്വയമെന്നോണം –

“ഞാനൊര് കരപറ്റുവോളം ഇരുട്ടില് വെളിച്ചം കാണിച്ച് കൂടെ വന്ന് ഒടുക്കം ഒരധീനത്തെത്തിയപ്പോ കുത്തിക്കെട്ത്തി വലിച്ചെറിയാൻ ന്റെ അച്ഛൻ ഓലച്ചൂട്ടല്ല… ന്റെ ജീവനാ… ജീവൻ … “

O O O

അച്ഛനെ ഇറുകെപ്പുണർന്ന് എല്ലാം മറന്ന് മകൻ സുരക്ഷിതത്വത്തിന്റെ മാറിൽ സുഖമായി ഉറങ്ങി .. മച്ചിലേക്ക് നോക്കിക്കിടന്ന നിറം മങ്ങിയ കണ്ണിലപ്പോൾ രണ്ടു നീർമുത്തുകൾ തിളങ്ങുന്നുണ്ടായിരുന്നു.

ആനന്ദത്തിന്റെ,

സംരക്ഷണത്തിന്റെ ,

കിട്ടിയാലും കൊടുത്താലും തീരാത്ത സ്നേഹത്തിന്റെ നീർമുത്തുകൾ..

മൃണാളിനി

മൃണാളിനി
●●~~●●

Writing Girl

“ഞാൻ പോവുകയാണ്.. അമ്മയെന്ന നിലയിൽ ഞാനെന്റെ കടമകൾ നിറവേറ്റിക്കഴിഞ്ഞിരിക്കുന്നു.

അന്വേഷിച്ച് വരരുത്..

വാശി പിടിച്ച് എന്നെ കണ്ടെത്തിയാൽ നിങ്ങൾക്ക് തിരികെ കൊണ്ടുവരാനാവുന്നത് എന്റെ മൃതശരീരം മാത്രമായിരിക്കും !
എന്ന് മൃണാളിനി.”

ഹരിയേട്ടനുമായുള്ള എന്റെ വിവാഹം കഴിഞ്ഞ് വെറും ഒമ്പതാം നാൾ പുലർച്ചെ ഈ കത്തെഴുതി വെച്ച് അമ്മ പോയി. തനിക്കു മാത്രമറിയാവുന്ന ഒരു ലോകത്തിലേക്ക്. തന്റേതു മാത്രമായ ഏതോ ഒരിടത്തേക്ക്. തന്റെ കുറച്ച് വസ്ത്രങ്ങളും ആഭരണങ്ങളും മാത്രമെടുത്ത്.

അച്ഛനെ ഉപേക്ഷിച്ച്.. എന്നേയും ചേച്ചിയേയും വേണ്ടെന്ന് വച്ച്.. സ്വന്തം ജീവനെപ്പോലെ സ്നേഹിച്ചിരുന്ന ചേച്ചിയുടെ രണ്ടു വയസ്സുകാരൻ അപ്പൂസിനെ പോലും കണ്ടില്ലെന്ന് നടിച്ച്.. മറ്റൊരു കുഞ്ഞിനെപ്പോലെ സൂക്ഷിച്ചിരുന്ന ഞങ്ങളുടെ വീടും തൊടികളും അനാഥമാക്കി..!

ഏഴു വർഷം പഴക്കമുള്ള ആ എഴുത്തിലെ അക്ഷരങ്ങൾ പല വട്ടം വായിച്ച് മനഃപ്പാഠമായതാണ്. എങ്കിലും ഇന്നത്തെയീ യാത്രക്കിടയിലും കണ്ണുകൾ നനയിച്ചു കൊണ്ട് കുനുകുനെ കോറിയിട്ട ആ വരികൾ ഓർമ്മയിലെത്തുന്നു. അന്നെത്ര അവിശ്വസനീയമായിട്ടാണ് ദേവു എന്ന് എല്ലാവരും വിളിച്ചിരുന്ന ഞങ്ങളുടെ അമ്മ മൃണാളിനിയായി, ഒരപരിചിതയേപ്പോലെ പടി കടന്നു പോയത് !

കാരിരുമ്പിന്റെ കരുത്തു ശരീരത്തിനും മനസ്സിനുമുണ്ടായിരുന്ന അച്ഛൻ സദാശിവൻ നായർ എന്ന അമ്പത്തിരണ്ടു വയസ്സുകാരൻ അന്നു മേശയിൽ ആഞ്ഞൊരടിയോടെ അതു സ്വീകരിച്ചു. പിന്നെ എരണം കെട്ടവൾ പത്തു നാൾ കഴിഞ്ഞ് തിരികെ വരുമെന്ന് ആക്രോശിച്ച് പുച്ഛിച്ച് തള്ളി. കരഞ്ഞ് തളർന്ന് നിന്ന എന്നോടും പകച്ച് സ്തബ്ദനായി നിന്ന ഹരിയേട്ടനോടും കൂടി പറഞ്ഞു..

“ഹും.. അന്വോഷിച്ച് വരുമത്രേ.. എന്റെ പട്ടി വരും..!”

അതെ.. അത്ര നിസ്സാരമായി അച്ഛൻ അന്നതു നേരിട്ടു. അന്നും പതിവുപോലെ ഒരുങ്ങി പത്തു മണി ആയപ്പോൾ തന്റെ ജ്വലറിയിലേക്ക് പോയി. രാത്രി പത്തു മണിക്ക് തിരികെയെത്തി പതിവുപോലെ തനിക്കു ഇഷ്ട്ടപ്പെട്ട മദ്യം അല്പം കഴിച്ച് അത്താഴമുണ്ട് കിടന്നുറങ്ങി. പിറ്റേന്ന് രാവിലെ അച്ഛൻ അന്നു പറഞ്ഞേൽപിച്ചിരുന്ന ഒരു സ്ത്രീ വന്നു പാചകവും മറ്റു പണികളും തുടങ്ങി. പിന്നേയും കരച്ചിലോടെ നിന്ന എന്നോടും ചേച്ചിയോടും അച്ഛൻ പറഞ്ഞു ” പുകഞ്ഞ കൊള്ളി പുറത്ത്. മറന്നു കള..”

എങ്ങിനെ മറക്കും ഞങ്ങൾ ? അതും രണ്ടു പെൺമക്കൾ ! അച്ഛനറിയാതെ ഭർത്താക്കന്മാരോടൊപ്പം രഹസ്യമായി അന്വേഷിക്കുക തന്നെ ചെയ്തു. അമ്മയുടെ ബന്ധു വീടുകളിൽ, അല്പമെങ്കിലും അടുപ്പം പുലർത്തിയിരുന്ന കൂട്ടുകാരികളുടെ വീടുകളിൽ, അമ്പലങ്ങളിൽ, അഗതി മന്ദിരങ്ങളിൽ..! നിരാശയായിരുന്നു ഫലം. ഒരു സൂചനയും തരാതെ.. ഒരെഴുത്തോ വിളിയോ ഇല്ലാതെ അമ്മ എവിടേയോ മറഞ്ഞിരുന്നു.

അമ്മ പറഞ്ഞിരുന്ന ഓരോ കുഞ്ഞു കാര്യങ്ങൾ പോലും ഓർമ്മ വന്നു. അമ്മയുടെ വാക്കുകളെല്ലാം തമാശയായിക്കണ്ട് തള്ളിക്കളഞ്ഞതോർത്ത് കരഞ്ഞു. വൈകി വീടെത്തുമ്പോൾ കാത്തു നിന്നിരുന്ന അമ്മയെ ശ്രദ്ദിക്കാതെ മൊബൈലിലേക്ക് തല പൂഴ്ത്തിയിരുന്ന നിമിഷങ്ങളെ ശപിച്ചു. നിശബ്ദയായി തന്റെ കടമകൾ ഒരു വേലക്കാരിയേപ്പോലെ ചെയ്തു കൊണ്ടിരുന്ന അമ്മയെ ഓർത്ത് അച്ഛനും നീറിതുടങ്ങിയിരുന്നെന്ന് തോന്നുന്നു.

ഹരിയേട്ടനേയും വീട്ടുകാരേയും ഓർത്ത് എനിക്കും ചേച്ചിക്കും പേടി തോന്നിയിരുന്നു. കല്യാണം കഴിഞ്ഞ് വെറും രണ്ടാഴ്ചക്കുള്ളിൽ അമ്മായിയമ്മ വീടു വിട്ടു പോവുക ! രഹസ്യമായി ആളുകൾ എന്തെല്ലാം പറഞ്ഞീട്ടുണ്ടാകും ! പക്ഷേ പക്വതയോടെ ഹരിയേട്ടൻ ഞങ്ങളെ സാന്ത്വനിപ്പിച്ചു.

“മനുഷ്യരുടെ ഉള്ളിന്റെയുള്ളിൽ അവർ അറിയാതെയെങ്കിലും പ്രണയിച്ച് കൊണ്ട് നടക്കുന്ന ചില ഇഷ്ട്ടങ്ങളുണ്ട്. ചിലർക്ക് സംഗീതം… ചിലർക്ക് സ്പോർട്സ്.. ചിലർക്ക് സമ്പത്ത്.. ചിലർക്ക് യാത്രകൾ . എത്ര ശ്രമിച്ചാലും അതിനുമപ്പുറം ഒരാളേയും പ്രണയിക്കാൻ അവർക്കാവില്ല.. ദമ്പതികൾക്കിടയിൽ പോലും ഇങ്ങനെ ചില ഒരേ ഇഷ്ട്ടങ്ങളാൽ ബന്ധിക്കപ്പെട്ടീട്ടില്ലങ്കിൽ യഥാർത്ഥ പ്രണയമുണ്ടാവില്ല ! പ്രണയിക്കുന്നു എന്ന അഭിനയമല്ലാതെ..! ഒരേ വഞ്ചിയിലിരുന്നു കൊണ്ട് വേറേ വേറേ തീരങ്ങളിലേക്ക് അവർ മനസ്സു കൊണ്ട് തുഴയും..”

അതെ.. ശരിയാണ് ഹരിയേട്ടൻ പറഞ്ഞത്. ചെറുപ്പത്തിൽ എന്നുമെന്നും അച്ഛനുമമ്മയും വഴക്കായിരുന്നു. വലിയ വീടും സമ്പാദ്യങ്ങളും സുഖ സൗകര്യങ്ങളും മാത്രമായിരുന്നു അച്ഛന്റെ ലക്ഷ്യങ്ങൾ. അമ്മയാവട്ടെ പുസ്തകങ്ങളുടേയും യാത്രകളുടേയും പിറകേ..! വ്യക്തിപരമായി നോക്കിയാൽ വളരെ നല്ലവർ.. പക്ഷേ കൂട്ടു കൂടിയപ്പോൾ ഒരേ കൂട്ടിലകപ്പെട്ട കീരിയും പാമ്പുമായി. ഒടുവിൽ അച്ഛൻ വിജയിച്ചു എന്നു തോന്നുന്നു. മൗനത്തിന്റെ.. നിസംഗതയുടെ തുരുത്തിലേക്ക് അമ്മ പതുക്കെ ചേക്കേറി. അതോ ഈ ഒഴിഞ്ഞു പോക്ക് എന്ന തീരുമാനത്തിലേക്കോ..?

അമ്മ പോയിട്ട് ആഴ്ചകൾ പിന്നെ മാസങ്ങളായി.. മാസങ്ങൾ വർഷങ്ങളായി.. ചേച്ചിയുടെ മോൻ അപ്പൂസിനു കൂട്ടായി അമ്മു കൂടിയെത്തി. എനിക്കും ഹരിയേട്ടനും ദൈവം ഒരു മോളേ തന്നു. അമ്മയുടെ പേരായ ദേവൂ എന്ന് ഞങ്ങളെല്ലാവരും അവളെ വിളിച്ചപ്പോൾ അച്ഛൻ മാത്രം മാളൂ എന്നവളെ വിളിച്ചു. ഒരു ജ്വലറി കൂടി തുടങ്ങി.. ദിവസങ്ങൾ കുറച്ചു കൂടെ തിരക്കുള്ളതായി. പുറമേക്ക് എല്ലാം സാധാരണ പോലെ കടന്നു പോയ്കൊണ്ടിരുന്നു. പക്ഷേ ഞങ്ങളുടെ ജീവിതത്തിന്റെ കാതൽ ചിതലെടുത്തു തുടങ്ങിയ പോലെ ആയിരുന്നു.

ഞാനും ചേച്ചിയും ഇടക്കിടെ മാറി മാറി വന്നു നിന്നെങ്കിലും അച്ഛൻ കൂടുതലും ഒറ്റക്കായി. മുൻപു വീട്ടിൽ മുഴങ്ങിയിരുന്ന ആ അട്ടഹാസവും ചിരിയും കേൾക്കാതെ ആയി. വീട്ടിൽ ഓടിക്കളിച്ചിരുന്ന കുറിഞ്ഞിപ്പൂച്ചയും മക്കളും എങ്ങോ പോയി. എന്നും പൂത്തു നിന്നിരുന്ന നന്ത്യാർവട്ടവും റോസാചെടികളും ഉണങ്ങി തുടങ്ങി. മാറി മാറി വന്ന പണിക്കാരി ചേച്ചിമാർ എത്ര വൃത്തിയാക്കിയിട്ടും വീട് ജീവനറ്റു നിറം മങ്ങിക്കിടന്നു.

ഭർത്താവും മക്കളുമൊക്കെയായി ഞാനും ചേച്ചിയും കുറേയൊക്കെ പിടിച്ചു നിന്നപ്പോൾ അച്ഛനായിരുന്നു തളർന്നു തുടങ്ങിയത്. സംസാരമെല്ലാം കുറഞ്ഞ്, ചിരിയുടെ തിളക്കം കുറഞ്ഞ്, വസ്ത്രങ്ങളുടെ നിറം കുറഞ്ഞ്.. എന്നിട്ടും വാശി വിട്ടില്ല. അന്വേഷിച്ചു പോകാൻ ഒരാളെയും സമ്മതിച്ചുമില്ല. ഒരു പോലീസ് സ്റ്റേഷനിലും പരാതി കൊടുത്തില്ല. പക്ഷേ ഓരോ ദിവസം ചെല്ലുന്തോറും ക്ഷീണിച്ച്. ക്ഷീണിച്ച്..! മുടിയെല്ലാം പെട്ടെന്ന് നരച്ച് ഒരു വൃദ്ധനായ്..!

ആദ്യം ഒരു ജ്വലറി വിറ്റു. പിന്നെ അടുത്തത്. ഇടക്ക് ഞങ്ങൾ രണ്ടു പേരുടേയും വീടുകളിൽ വന്നു നിന്നു. അമ്പലങ്ങളിലും മറ്റും ഇടക്ക് യാത്രകൾ പോയി. പിന്നെ ഒടുവിൽ മുറിക്ക് പുറത്ത് വരാൻ പോലും താത്പര്യമില്ലാതെ തനിയെ ആ വലിയ വീട്ടിൽ. അറുപതു വയസ്സാവുന്നതിനു മുമ്പേ തന്നെ ഒരെൺപതുകാരനെപ്പോലെ !

കഴിഞ്ഞ ആഴ്ച ആയിരുന്നു ആ വാർത്ത കണ്ടത്. തന്റെ ആദ്യ നോവലിന് തന്നെ അക്കാദമി പുരസ്കാരം നേടിയ മൃണാളിനി എന്ന പുതിയ എഴുത്തുകാരിയെക്കുറിച്ച്. വെറുതെ ഒരു കൗതുകത്തിന് ഒന്ന് തിരഞ്ഞു. അവരെ ആരും നേരിട്ടു കണ്ടിട്ടില്ലെന്നറിഞ്ഞപ്പോൾ ആകാംഷയായി. ഒടുവിൽ പത്രത്തിൽ ജോലി ചെയ്യുന്ന ഒരു കൂട്ടുകാരിയെക്കൊണ്ട് അന്വേഷിച്ചറിഞ്ഞപ്പോൾ ഞെട്ടിപ്പോയി. അമ്മ തന്നെ..!

ബാംഗ്ളൂരിലെ ഒരു മികച്ച വിദ്യാലയത്തിലെ അഡ്രസ്സാണ് കിട്ടിയത്. അമ്മ അധ്യാപികയോ ? ഇനിയും കാണാതിരിക്കാനാവില്ല. ഡൽഹിയിലുള്ള ചേച്ചിയെ വിളിച്ചു പറഞ്ഞു. ഹരിയേട്ടനേയും കൊണ്ട് അമ്മയെ കാണാൻ പോവുകയാണെന്നു പറഞ്ഞപ്പോൾ അച്ഛനും വരണമെന്ന്. നിശബ്ദരായിരിക്കുന്ന മൂന്ന് യാത്രക്കാർ. ഇനിയിപ്പോ അവിടെയെത്താൻ ഏതാനും മണിക്കൂറുകളും.

ഒടുവിൽ വലിയ മരങ്ങൾ വളർന്നു നില്ക്കുന്ന മനോഹരമായ ആ ക്യാംപസിനുള്ളിലേക്ക്. രാവിലെ എട്ടു മണി ആവുന്നേ ഒള്ളൂ.. ഒത്തിരി ചോദ്യങ്ങൾക്കും ഉത്തരങ്ങൾക്കും ശേഷം അധ്യാപകർ താമസിക്കുന്ന ഭാഗത്തെ ആ വീടിന്റെ അഡ്രസ്സ് കിട്ടി. ആ പടിക്കൽ കാറെത്തുമ്പോഴേക്കും നെഞ്ചിടിപ്പ് കൂടി കൂടി വന്നു.

അച്ഛനോട് തത്ക്കാലം കാറിലിരിക്കാൻ പറഞ്ഞ് ഞാനും ഹരിയേട്ടനും ബെല്ലടിച്ച് കാത്തു നിന്നു. വന്നു വാതിൽ തുറന്ന അമ്മ ഒന്നു ഞെട്ടിയോ ? ഒരു നിമിഷം നിന്ന്.. ഒരു ദീർഘശ്വാസം ഒതുക്കി ഒരു ഭാവ വിത്യാസമില്ലാതെ പറഞ്ഞു.

” ആ.. നീയോ..? വരൂ.. വരൂ ഹരീ.. അകത്തേക്ക് വരൂ.. ഇരിക്കൂ..”

എഴു വർഷങ്ങൾക്ക് ശേഷം കാണുന്ന മകളോട് ഇങ്ങിനെ പെരുമാറാൻ എങ്ങിനെ കഴിയുന്നു! പരസ്പരം ഒന്ന് മുഖം നോക്കി ഞാനും ഹരിയും അകത്തു കടന്നിരുന്നു.

“യാത്ര സുഖമായിരുന്നോ..?”

എത്ര ഔപചാരികതയോടെയാണ് അമ്മ ചോദിക്കുന്നത്! ഹരിയാണ് അതെ എന്നു പറഞ്ഞത്. നിറഞ്ഞ കണ്ണുകളോടെ ഞാൻ അമ്മയെയും ആ വീടും നോക്കിയിരുന്നു. അമ്മ ഒന്നു കൂടെ വണ്ണം വെച്ചിരിക്കുന്നു. അല്പം നര ഉണ്ടെങ്കിലും കണ്ണട വച്ച ആ മുഖത്തിന് ഭംഗി കൂടിയീട്ടേ ഉള്ളൂ. ചെറുതെങ്കിലും വൃത്തിയുള്ള മനോഹരമായ വീട്.

ഹരിക്കും അമ്മക്കുമിടയിൽ നടന്ന കുറേ സംസാരങ്ങൾ ഞാൻ കേൾക്കുന്നുണ്ടായിരുന്നില്ല.

“ഞാൻ ചായയെടുക്കാം.. ” എന്നു പറഞ്ഞ് അമ്മ അടുക്കളയിലേക്ക് പോയപ്പോൾ ഞാനും പുറകെക്കൂടി. പോകുന്ന വഴി ബെഡ് റൂമിലെ ടേബിളിൽ ഫ്രെയിം ചെയ്തു വെച്ചിരിക്കുന്ന അച്ഛന്റേയും എന്റേയും ചേച്ചിയുടേയും ചിത്രം ! അപ്പോൾ അമ്മ മറന്നിട്ടില്ല..

ഇപ്പോഴും വെറും പരിചയക്കാരേപ്പോലെ അമ്മ നില്ക്കുന്നതു കണ്ട് എനിക്ക് സങ്കടം വന്നു.

“എന്താ അമ്മേ ഇങ്ങനെയൊക്കെ ? അമ്മക്ക് എങ്ങിനെ ഇങ്ങിനെയൊക്കെ ആവാൻ കഴിയുന്നു.?”

ഒന്നു തിരിഞ്ഞു നോക്കി ചെറുതായി ചിരിച്ച് അമ്മ തിളക്കാറായ പാലിലേക്ക് നോക്കി നിന്നു.

“പറയു അമ്മേ.. ആ പാവം ദേവുവിന് എങ്ങിനെ മൃണാളിനി ആയി മാറാൻ കഴിഞ്ഞു ? ഞങ്ങളെ ഒന്നു കാണണമെന്ന് അമ്മക്ക് തോന്നിയില്ലേ..”

തേയില ഇട്ട് .. അല്പം കഴിഞ്ഞ് സ്റ്റൗവ് ഓഫ് ചെയ്തു തല ചെരിച്ച് എന്നെ നോക്കി അമ്മ പറഞ്ഞു..

“ഡിഗ്രിക്ക് പഠിച്ചു കൊണ്ടിരുന്ന മൃണാളിനി എന്ന പെൺകുട്ടിയെ നിന്റെ അച്ഛനാണ് മാറ്റിയത്. വിളിക്കാൻ ബുദ്ധിമുട്ടാണെന്ന് പറഞ്ഞ് പേരു പോലും മാറ്റി ! മേൽവിലാസം നഷ്ട്ടപെട്ട.. സ്വന്തം വ്യക്തിത്വം നഷ്ട്ടപ്പെട്ട ഞാൻ നമ്മുടെ വീട്ടിലാണ് അഭിനയിച്ചു കൊണ്ടിരുന്നത്.
നിങ്ങളുടെ ഇഷ്ട്ടങ്ങൾക്കു വേണ്ടി മാത്രമാണ് ദേവുവായി ഞാൻ ജീവിച്ചത്. അഭിനയിച്ചു മടുത്തപ്പോൾ ഞാൻ എന്നിലേക്ക് മടങ്ങി വന്നു. അത്രയേ ഉള്ളു..!”

എനിക്ക് കേട്ടു നില്ക്കാനേ ആയുള്ളു.. ഗ്‌ളാസുകളിൽ ചായയെടുത്ത് ട്രേയിൽ വച്ച് ഹരിക്കടുത്തേക്ക് നടക്കുമ്പോൾ അമ്മ തുടർന്നു..

“ഇവിടെ വന്നു പഠിത്തം പൂർത്തിയാക്കി. പിന്നെ ഇഷ്ട്ട ജോലിയായ അധ്യാപികയായി. ഇടക്കിടക്ക് ഒരു പാട് യാത്രകൾ ചെയ്തു. ഒത്തിരി വായിച്ചു. പിന്നെ എഴുതാനും തുടങ്ങി. ഇപ്പോൾ ഞാൻ സന്തോഷവതിയാണ്.. നിങ്ങളും സന്തോഷമായിട്ടിരിക്കൂ.. “

ചായ നല്കിയീട്ട് അമ്മ ജോലിക്ക് പോകാൻ തയ്യാറാവുന്നതു പോലെ തോന്നി. ഞാൻ ഹരിയേട്ടനെ ഒന്നു നോക്കി അമ്മയോട് പറഞ്ഞു.

“അച്ഛന് ഒന്ന് കാണണമെന്നുണ്ട്. പുറത്തുണ്ട്. വിളിച്ചോട്ടെ ഞാൻ ?”

“അതിനെന്താ.. വിളിക്കൂ..!”

ഒരു ഭാവഭേദവുമില്ലാതെ അമ്മ പറഞ്ഞു.

ഹരിയേട്ടൻ പോയി അച്ഛനെ വിളിച്ചു കൊണ്ടു വന്നു. തലേ രാത്രിയിലെ യാത്രാ ക്ഷീണം കൂടി ആയപ്പോൾ അച്ഛന് ശരിക്കു വയ്യാത്തതു പോലെ തോന്നി.

അച്ഛനെ കണ്ടപ്പോൾ അമ്മ ഒന്നു ഞെട്ടിയതുപോലെ തോന്നി. എങ്കിലും പറഞ്ഞു.

“ഇരിക്കൂ.. ചായ കഴിക്കൂ..”
ഒന്നു ചിരിച്ചെന്ന് വരുത്താൻ പാടുപെട്ട് നിശ്ശബ്ദനായിരുന്ന് അച്ഛൻ ചായ കുടിച്ചു. പിന്നീട് ആരെങ്കിലും എന്തെങ്കിലും പറയും മുൻപ് അമ്മ പറഞ്ഞു.

“എനിക്ക് ജോലിക്ക് പോകേണ്ട നേരമായി..”

” ഉം.. ഞങ്ങളിറങ്ങുകയാണ്.”

അമ്മയെ ഇനിയും ബുദ്ധി മുട്ടിക്കേണ്ടെന്ന് എനിക്ക് തോന്നി. നമ്മെ വേണ്ടാത്തവരെ നമ്മൾ ശല്യപ്പെടുത്തരുതല്ലോ !

ഞങ്ങൾ മൂന്നു പേരും എഴുന്നേറ്റ് പുറത്തേക്ക് നടക്കുമ്പോഴും അമ്മ ചെറു പുഞ്ചിരിയോടെ നിന്നു. കാറിൽ കയറുന്നതിന് തൊട്ടു മുമ്പ് അച്ചൻ അമ്മയെ ഒന്ന് തിരിഞ്ഞു നോക്കി. പിന്നെ എന്തോ ഓർത്തെന്ന വണ്ണം ചോദിച്ചു.

“എനിക്ക് കുറച്ചു ദിവസങ്ങൾ ഇവിടെ താമസിക്കണമെന്നുണ്ട്. ബുദ്ധിമുട്ടാവില്ലെങ്കിൽ…..”

അമ്മയുടെ കണ്ണുകൾ നിറഞ്ഞു അറിയാതെ ഒരു തുള്ളി കണ്ണുനീർ താഴേക്കുരുണ്ടു. ചുണ്ടുകൾ ഒന്നു വിതുമ്പി.

“അതിനെന്താ.. തീർച്ചയായും നില്ക്കാം.. ഈ ഏകാന്തത എപ്പോഴും മനോഹരം തന്നെയാണ്. പക്ഷേ അതൊന്നു പറയുവാൻ ആരെങ്കിലും വേണം !”

 

(സ്കൂൾ കലോത്സവം 2018 ഒന്നാം സ്ഥാനം)