നായ്ക്കൾ കുരയ്ക്കും എന്നത് സ്വാഭാവികമാണ്. എന്നാൽ കുരയ്ക്കാൻ ഒട്ടും അറിയാത്ത, പകരം ‘യോഡ്ലിംഗ്’ പോലെ പാട്ടുപാടുന്ന ഒരു നായയെക്കുറിച്ച് നിങ്ങൾ കേട്ടിട്ടുണ്ടോ? അതാണ് ആഫ്രിക്കൻ വനങ്ങളിൽ നിന്നുള്ള ബാസെഞ്ചി (Basenji)!

ആയിരക്കണക്കിന് വർഷം പഴക്കമുള്ള ചരിത്രമുള്ള, ഫറവോമാരുടെ പ്രിയപ്പെട്ടവരായിരുന്ന, സ്വന്തം ശരീരം പൂച്ചയെപ്പോലെ നക്കി തുടച്ച് വൃത്തിയായി സൂക്ഷിക്കുന്ന ഈ വിചിത്ര കൂട്ടുകാരന്റെ വിശേഷങ്ങൾ അറിയാം…

നായ്ക്കളെപ്പോലെ സാധാരണ രീതിയിൽ കുരയ്ക്കാത്ത (Barkless dog) ഒരു പ്രത്യേക ഇനം നായയാണ് ബാസെഞ്ചി (Basenji). സെൻട്രൽ ആഫ്രിക്കയാണ് (പ്രധാനമായും കോംഗോ പ്രദേശം) ഇവയുടെ സ്വദേശം. അതുകൊണ്ടുതന്നെ ഇവയെ ‘കോംഗോ ഡോഗ്’ (Congo Dog) എന്നും വിളിക്കാറുണ്ട്.

ഇവയ്ക്ക് ശബ്ദനാളത്തിന്റെ (Larynx) പ്രത്യേകത കാരണം സാധാരണ നായ്ക്കളെപ്പോലെ കുരയ്ക്കാൻ കഴിയില്ല. എന്നാൽ സന്തോഷം തോന്നുമ്പോഴും മറ്റും ഇവ തൊണ്ടയിൽ നിന്നും ഒരുതരം പ്രത്യേക ശബ്ദം പുറപ്പെടുവിക്കാറുണ്ട്. ഇത് കേൾക്കാൻ ഏതാണ്ട് ‘യോഡ്ലിംഗ്’ (Yodeling – സംഗീതത്തിലെ ഒരു പ്രത്യേക ആലാപന ശൈലി) പോലെയാണ്.

ഇവ പൂച്ചകളെപ്പോലെ സ്വന്തം ശരീരം നക്കി തുടച്ച് വൃത്തിയായി സൂക്ഷിക്കാറുണ്ട്. കൂടാതെ മറ്റു നായ്ക്കളെ അപേക്ഷിച്ച് ഇവയ്ക്ക് ശരീരത്തിൽ നിന്ന് സാധാരണ നായകളുടെ ഗന്ധം വരികയുമില്ല.

ഈജിപ്ഷ്യൻ ഫറവോമാരുടെ കാലഘട്ടത്തിലെ ചിത്രങ്ങളിലും കൊത്തുപണിയിലും വരെ ബാസെഞ്ചി ഇനം നായ്ക്കളുടെ രൂപം കാണാൻ സാധിക്കും. ലോകത്തിലെ ഏറ്റവും പഴയ നായ വർഗ്ഗങ്ങളിൽ ഒന്നാണിത്.

ചുരുണ്ട വാലും, നെറ്റിയിലെ ചെറു ചുളിവുകളും ഇവയുടെ പ്രത്യേകതയാണ്. ബുദ്ധിശാലികളും അതീവ ജാഗ്രതയുള്ളവരുമായ ഇവ മികച്ച വേട്ടയാടൽ കഴിവുള്ളവയാണ്.

Sreekala Prasad