‘കത്തുന്ന മുൾപ്പടർപ്പിന്റെ’ മണ്ണിലെ അപൂർവ ഗ്രന്ഥശേഖരം: സെന്റ് കാതറിൻ മൊണാസ്ട്രിയുംലോകത്തിലെ ഏറ്റവും പഴയ ലൈബ്രറിയും

ബൈബിളിൽ മോശെ പ്രവാചകന് ദൈവാനുഭവം ഉണ്ടായ ആ വിശുദ്ധ മണ്ണിൽ, പതിനാല് നൂറ്റാണ്ടുകളായി അറിവിന്റെ വെളിച്ചം പടർത്തുന്ന ഒരു തീർത്ഥാടന കേന്ദ്രമുണ്ട്; സെന്റ് കാതറിൻ മൊണാസ്ട്രി. കാലത്തെ അതിജീവിച്ച ഈ സന്യാസിമഠത്തിന്റെയും അവിടുത്തെ വിഖ്യാതമായ ലൈബ്രറിയുടെയും വിശേഷങ്ങൾ വായിക്കാം…

നൂറ്റാണ്ടുകൾ കടന്നുപോയിട്ടും മാറ്റമില്ലാതെ തുടരുന്ന ചില ഇടങ്ങളുണ്ട്. ഈജിപ്തിലെ സിനായ് പർവത താഴ്‌വരയിൽ സ്ഥിതിചെയ്യുന്ന സെന്റ് കാതറിൻ മൊണാസ്ട്രിയും ലോകത്തിലെ ഏറ്റവും പഴക്കമുള്ള അതിന്റെ ലൈബ്രറിയും അത്തരമൊരു അത്ഭുതമാണ്. ക്രിസ്തുവിനും മുൻപുള്ള അപൂർവ താളിയോലകളും പുരാതന ബൈബിൾ പ്രതികളും കാത്തുസൂക്ഷിക്കുന്ന ഈ ചരിത്രസങ്കേതം ആറാം നൂറ്റാണ്ടിൽ (ക്രി. പി. 548 – 565) ബൈസന്റൈൻ ചക്രവർത്തിയായ ജസ്റ്റിനിയൻ ഒന്നാമനാണ് ഇത് നിർമ്മിച്ചത്. ബൈബിളിൽ മോശെ പ്രവാചകന് ദൈവാനുഭവം ഉണ്ടായ “കത്തുന്ന മുൾപ്പടർപ്പ്” (Burning Bush) സ്ഥിതി ചെയ്യുന്ന സ്ഥലത്താണ് ഈ മഠം നിലകൊള്ളുന്നത് എന്ന് വിശ്വസിക്കപ്പെടുന്നു.

ഈജിപ്തിലെ സിനായ് പെനിൻസുലയുടെ ആഴത്തിൽ, ഗ്രാനൈറ്റ് പാറയും പരുക്കൻ പർവതങ്ങളും നിർമ്മിതമായ ഒരു മരുഭൂമിയിൽ, സെന്റ് കാതറിൻ പട്ടണം സ്ഥിതിചെയ്യുന്നു. ഇവിടെ, സീനായ് പർവതത്തിന്റെ അടിവാരത്ത്, മോശയ്ക്ക് ദൈവത്തിൽ നിന്ന് പത്ത് കൽപ്പനകൾ ലഭിച്ചതായി വിശ്വസിക്കപ്പെടുന്നു. സ്വാഭാവികമായും, ഈ പ്രദേശം ക്രിസ്ത്യാനികൾക്കും ജൂതന്മാർക്കും മുസ്ലീങ്ങൾക്കും ഒരുപോലെ വിശുദ്ധമാണ്.

തുടർച്ചയായി പ്രവർത്തിച്ചുകൊണ്ടിരിക്കുന്ന ലോകത്തിലെ ഏറ്റവും പഴക്കമുള്ള ലൈബ്രറിയാണ് സെന്റ് കാതറിൻ മൊണാസ്ട്രിയിലുള്ളത്. വത്തിക്കാൻ ലൈബ്രറി കഴിഞ്ഞാൽ, പുരാതനമായ അപൂർവ കൈയെഴുത്തുപ്രതികളുടെയും (Ancient Manuscripts) കോഡെക്സുകളുടെയും ഏറ്റവും വലിയ ശേഖരം ഇവിടെയാണ് സൂക്ഷിച്ചിരിക്കുന്നത്.

ഗ്രീക്ക്, അറബിക്, സിറിയക്, ജോർജിയൻ, അർമേനിയൻ തുടങ്ങിയ വിവിധ ഭാഷകളിലുള്ള അയ്യായിരത്തിലധികം പുരാതന പുസ്തകങ്ങളും കയ്യെഴുത്തുപ്രതികളും ഇവിടെയുണ്ട്. ബൈബിളിന്റെ ഏറ്റവും പഴയതും അപൂർണ്ണമല്ലാത്തതുമായ പ്രതികളിൽ ഒന്നായ കോഡെക്സ് സിനായിറ്റിക്കസ് (Codex Sinaiticus), നാലാം നൂറ്റാണ്ടിലെ സിറിയക് ബൈബിൾ പ്രതികൾ എന്നിവ ഇവിടെ നിന്നാണ് കണ്ടെത്തിയത്

2002-ൽ യുനെസ്കോ (UNESCO) സെന്റ് കാതറിൻ മൊണാസ്ട്രിയെ ലോക പൈതൃക കേന്ദ്രമായി പ്രഖ്യാപിച്ചു. പ്രകൃതിദുരന്തങ്ങളോ ആക്രമണങ്ങളോ നേരിടാതെ നൂറ്റാണ്ടുകളായി ചരിത്രപരമായ രേഖകളും അപൂർവ ആർട്ട് വർക്കുകളും തനിമയോടെ കാത്തുസൂക്ഷിക്കാൻ സാധിച്ചു എന്നതാണ് ഈ ലൈബ്രറിയുടെയും മഠത്തിന്റെയും പ്രത്യേകത.

Sreekala Prasad