ചരിത്രത്തിന്റെ താളുകളിലെ ദുരന്ത നായ!

ലോകം കണ്ട ഏറ്റവും ക്രൂരനായ ഏകാധിപതിയുടെ ഹൃദയത്തിലും സ്നേഹത്തിന്റെ ഒരു കണികയുണ്ടായിരുന്നു… പക്ഷേ, ആ വിശ്വസ്തതയ്ക്ക് ഒടുവിൽ ലഭിച്ചത് ദാരുണമായ ഒരു അന്ത്യമായിരുന്നു. അഡോൾഫ് ഹിറ്റ്‌ലറെയും അദ്ദേഹത്തിന്റെ പ്രിയപ്പെട്ട വളർത്തുനായ ‘ബ്ലോണ്ടി’യെയും കുറിച്ചുള്ള ആ കഥ ഇതാ…

അഡോൾഫ് ഹിറ്റ്ലറുടെ വളർത്തുനായയായിരുന്നു ബ്ലോണ്ടി (Blondi). ജർമ്മൻ ഷെപ്പേർഡ് (German Shepherd) ഇനത്തിൽപ്പെട്ട ഈ നായ ഹിറ്റ്ലറുടെ ജീവിതത്തിലെ അവസാന വർഷങ്ങളിൽ അദ്ദേഹത്തോടൊപ്പമുണ്ടായിരുന്നു.

1941-ൽ പാർട്ടി സെക്രട്ടറിയായിരുന്ന മാർട്ടിൻ ബോർമാൻ ആണ് ബ്ലോണ്ടിയെ ഹിറ്റ്ലർക്ക് സമ്മാനമായി നൽകിയത്.അതിനുമുമ്പും ഹിറ്റ്‌ലർക്ക് നായ്ക്കളുണ്ടായിരുന്നെങ്കിലും, ബ്ലോണ്ടിയോട് അദ്ദേഹത്തിന് പ്രത്യേക സ്നേഹവും അടുപ്പവുമുണ്ടായിരുന്നു.

അതിനുമുമ്പും ഹിറ്റ്‌ലർക്ക് നായ്ക്കളുണ്ടായിരുന്നെങ്കിലും, ബ്ലോണ്ടിയോട് അദ്ദേഹത്തിന് പ്രത്യേക സ്നേഹവും അടുപ്പവുമുണ്ടായിരുന്നു.

നാസി പാർട്ടി ഹിറ്റ്‌ലറുടെ പ്രതിച്ഛായ വർദ്ധിപ്പിക്കാൻ ബ്ലോണ്ടിയെ വലിയ രീതിയിൽ ഉപയോഗിച്ചു. ലോകം കാണുന്ന ക്രൂരനായ ഭരണാധികാരി എന്നതിന് പുറമെ, മൃഗങ്ങളെ സ്നേഹിക്കുന്ന, കരുണയുള്ള വ്യക്തിയായി ഹിറ്റ്‌ലറെ ചിത്രീകരിക്കാൻ ബ്ലോണ്ടിയുമൊത്തുള്ള ചിത്രങ്ങളും വീഡിയോകളും മാധ്യമങ്ങളിൽ പ്രചരിപ്പിച്ചു.

രണ്ടാം ലോകമഹായുദ്ധത്തിന്റെ അവസാന നാളുകളിൽ, 1945 ജനുവരിയിൽ ഹിറ്റ്‌ലർ ബർലിനിലെ ഭൂഗർഭ ബങ്കറിലേക്ക് (Führerbunker) മാറിയപ്പോഴും ബ്ലോണ്ടിയെ കൂടെക്കൂട്ടി. ബങ്കറിൽ ഹിറ്റ്‌ലറുടെ കിടപ്പുമുറിയിൽ തന്നെയാണ് അത് ഉറങ്ങിയിരുന്നത്. ഏപ്രിൽ മാസത്തിൽ ബ്ലോണ്ടി അഞ്ച് കുഞ്ഞുങ്ങൾക്ക് ജന്മം നൽകുകയും ചെയ്തു.

ഹിറ്റ്‌ലറുടെ പങ്കാളിയായിരുന്ന ഇവാ ബ്രൗണിന് ബ്ലോണ്ടിയോട് വലിയ താല്പര്യമുണ്ടായിരുന്നില്ല. ഇവായ്ക്ക് സ്വന്തമായി രണ്ട് സ്കോട്ടിഷ് ടെറിയർ (Scottish Terrier) ഇനത്തിൽപ്പെട്ട നായ്ക്കളുണ്ടായിരുന്നു. മേശയ്ക്കടിയിലൂടെ ഇവാ ബ്ലോണ്ടിയെ തൊഴിക്കാറുണ്ടായിരുന്നുവെന്ന് ഹിറ്റ്‌ലറുടെ സെക്രട്ടറി പിന്നീട് വെളിപ്പെടുത്തിയിട്ടുണ്ട്.

1945 ഏപ്രിൽ 29-ന്, ആത്മഹത്യയ്ക്ക് തലേദിവസം, തന്റെ പക്കലുള്ള സൈനൈഡ് (Cyanide) ഗുളികകൾ വ്യാജമാണോ എന്ന് ഹിറ്റ്‌ലർക്ക് സംശയമുണ്ടായി. തുടർന്ന് ഡോക്ടർ വെർനർ ഹാസെയോട് (Dr. Werner Haase) ഗുളികയുടെ ശക്തി ബ്ലോണ്ടിയിൽ പരീക്ഷിക്കാൻ നിർദ്ദേശിച്ചു. വിഷം ഉള്ളിൽച്ചെന്ന് ബ്ലോണ്ടി തൽക്ഷണം മരണപ്പെട്ടു.

ബ്ലോണ്ടിയുടെ മരണം ഹിറ്റ്‌ലറെ വല്ലാതെ തകിടം മറിച്ചുവെന്നും, ഏപ്രിൽ 30-ന് ഹിറ്റ്‌ലർ ആത്മഹത്യ ചെയ്ത ശേഷം ബ്ലോണ്ടിയുടെ കുഞ്ഞുങ്ങളെയും ബങ്കറിലുണ്ടായിരുന്ന മറ്റ് നായ്ക്കളെയും റഷ്യൻ സൈന്യത്തിന്റെ കയ്യിൽ അകപ്പെടാതിരിക്കാൻ സൈനിക ഉദ്യോഗസ്ഥർ വെടിവെച്ചുകൊല്ലുകയുമായിരുന്നു.

Sreekala Prasad