ജനങ്ങളുടെ കാശ് തിന്ന് തടിച്ചാൽ കൂവൽ ഉറപ്പ്! മേയറെ തൂക്കിനോക്കുന്ന ഈ അപൂർവ്വ ആചാരത്തെക്കുറിച്ച് അറിയാമോ?

മേയറുടെ ഭാരം തൂക്കിനോക്കുന്ന ഹൈ വൈക്കോംബ്

അധികാരം കിട്ടിയാൽ സുഖിച്ച് ജീവിച്ച് തടിക്കുന്ന ജനപ്രതിനിധികളെ നമ്മൾ കണ്ടിട്ടുണ്ട്. എന്നാൽ മേയർ തടിച്ചോ മെലിഞ്ഞോ എന്ന് അറിയാൻ വർഷത്തിലൊരിക്കൽ പരസ്യമായി തൂക്കിനോക്കുന്ന ഇംഗ്ലണ്ടിലെ ഹൈ വൈക്കോംബിലെ (High Wycombe) രസകരമായ ആചാരവിശേഷം അറിയാം!

പതിനേഴാം നൂറ്റാണ്ടിലാണ് ഈ പരമ്പരാഗത ചടങ്ങ് ആരംഭിച്ചത്. അന്നത്തെ മേയർമാർ പൊതുജനങ്ങൾക്കായി നീക്കിവെച്ചിട്ടുള്ള നികുതിപ്പണം ദുരുപയോഗം ചെയ്യുകയും, ജനങ്ങളുടെ ചെലവിൽ അമിതമായി ഭക്ഷണം കഴിച്ച് തടിച്ചുകൊഴുക്കുകയും ചെയ്യുന്നുവെന്ന പരാതി ഉയർന്നു. ഇതിന് പരിഹാരമായാണ് ഓരോ വർഷവും മേയറുടെ ഭാരം പരസ്യമായി തൂക്കിനോക്കാൻ തുടങ്ങിയത്.

ഓരോ വർഷവും മെയ് മാസത്തിൽ പുതിയ മേയർ സ്ഥാനമേൽക്കുമ്പോഴാണ് ഈ ചടങ്ങ് നടത്തുന്നത്. പട്ടണത്തിലെ പ്രധാന തെരുവിൽ (High Street) പ്രത്യേകം തയ്യാറാക്കിയ വലിയൊരു പിച്ചള തുലാസിലാണ് മേയറെയും മറ്റ് കൗൺസിലർമാരെയും ഉദ്യോഗസ്ഥരെയും ഇരുത്തി ഭാരം അളക്കുന്നത്.

മേയറുടെ ഭാരം കഴിഞ്ഞ വർഷത്തേക്കാൾ കൂടുതലാണെങ്കിൽ, അദ്ദേഹം ജനങ്ങളുടെ പണം ഉപയോഗിച്ച് അമിതമായി സുഖലോലുപത അനുഭവിച്ചു എന്നതിൻ്റെ ലക്ഷണമായി കണക്കാക്കി കാണികൾ “And some more!” (ഇനിയും കൂട്ടിയിട്ടുണ്ട്!) എന്ന് വിളിച്ച് കൂവുകയും ബഹളം വെക്കുകയും ചെയ്യുന്നു.

എന്നാൽ ഭാരം കുറയുകയോ മാറ്റമില്ലാതെ തുടരുകയോ ചെയ്താൽ, അദ്ദേഹം കാര്യക്ഷമമായി ജോലി ചെയ്തു എന്നതിൻ്റെ സൂചനയായിക്കണ്ട് ജനങ്ങൾ “And no more!” (കൂടിയിട്ടില്ല!) എന്ന് പറഞ്ഞ് കൈയടിച്ച് അഭിനന്ദിക്കുന്നു.

പഴയകാലത്ത് ജനങ്ങൾ തക്കാളിയും ചീഞ്ഞ മുട്ടയും മേയർക്ക് നേരെ എറിയാറുണ്ടായിരുന്നുവെങ്കിൽ, ഇന്ന് ഇത് വളരെ വിനോദകരമായ ഒരു സാമൂഹിക ഉത്സവമായിട്ടാണ് ആഘോഷിക്കുന്നത്. തൂക്കം അളന്നു കിട്ടുന്ന തുകയിൽ വലിയൊരു പങ്ക് പ്രാദേശിക ജീവകാരുണ്യ പ്രവർത്തനങ്ങൾക്കായാണ് ഉപയോഗിക്കുന്നത്.

ലോകത്തിൽ ഹൈ വൈക്കോംബിൽ മാത്രമാണ് ഇത്തരമൊരു വിചിത്രവും രസകരവുമായ നഗരഭരണ ആചാരം ഇന്നും നിലനിൽക്കുന്നത്.

ഇംഗ്ലണ്ടിലെ മേയർമാർക്ക് വണ്ണമാണ് കൂടുന്നതെങ്കിൽ നമ്മുടെ നാട്ടിലെ ജനപ്രതിനിധികൾക്ക് കൂടുന്നത് ‘ആസ്തിയും സമ്പത്തും’ ആണല്ലോ! അതുകൊണ്ട് നമ്മുടെ നാട്ടിൽ ഇങ്ങനെയൊരു ആചാരം കൊണ്ടുവരികയാണെങ്കിൽ, ശരീരഭാരമല്ല അവരുടെ ‘ബാങ്ക് ബാലൻസും സ്വത്ത് വിവരങ്ങളും’ ആണ് തുലാസിൽ വെച്ച് തൂക്കേണ്ടത്. അധികാരമേൽക്കുമ്പോഴുള്ള സ്വത്തും അഞ്ചുകൊല്ലം കഴിയുമ്പോഴുള്ള സ്വത്തും തമ്മിൽ തൂക്കി നോക്കാൻ ഒരു തുലാസ് ഉണ്ടായിരുന്നെങ്കിൽ സംഗതി പൊളിച്ചേനെ, അല്ലേ? ഇതിനെക്കുറിച്ച് നിങ്ങൾക്കെന്താണ് തോന്നുന്നത്?

Sreekala Prasad