ഒറ്റനോട്ടത്തിൽ കണ്ടാൽ ബഹിരാകാശ വാഹനങ്ങൾ അയച്ച ചൊവ്വയുടെ ചിത്രമാണെന്നേ കരുതൂ. എന്നാൽ സംഭവം നമ്മുടെ ഭൂമിയിൽ തന്നെയാണ്! മനുഷ്യർ ആരും തന്നെ ജീവിക്കാത്ത, ലോകത്തിലെ ഏറ്റവും വലിയ ദ്വീപായ ഡെവൺ ഐലൻഡ് (Devon Island). എന്തുകൊണ്ടാണ് ശാസ്ത്രലോകം ഇതിനെ “ഭൂമിയിലെ ചൊവ്വ” എന്ന് വിളിക്കുന്നത്? നാസ വരെ ഇവിടെ എത്തി ഗവേഷണം നടത്താൻ കാരണമെന്ത്? വായിക്കാം…

ഡെവൺ ദ്വീപ് (Devon Island) കാനഡയിലെ ആർട്ടിക് ദ്വീപസമൂഹത്തിൽ സ്ഥിതിചെയ്യുന്ന, ലോകത്തിലെ തന്നെ ഏറ്റവും വലിയ ജനവാസമില്ലാത്ത ദ്വീപ് ആണ്. ഭൂമിശാസ്ത്രപരമായും കാലാവസ്ഥാപരമായും ചൊവ്വാഗ്രഹത്തോട് വളരെ സാദൃശ്യമുള്ള അന്തരീക്ഷമായതിനാലാണ് ഇത് “ഭൂമിയിലെ ചൊവ്വ” (Mars on Earth) എന്നറിയപ്പെടുന്നത്.

ഏകദേശം 55,247 ചതുരശ്ര കിലോമീറ്റർ വിസ്തൃതിയുള്ള ഈ ദ്വീപ്, സ്വിറ്റ്‌സർലൻഡ് അല്ലെങ്കിൽ ക്രൊയേഷ്യ എന്നീ രാജ്യങ്ങളേക്കാൾ വലുതാണ്.കാനഡയിലെ ‘നുനാവുട്ട്’ (Nunavut) പ്രദേശത്ത്, ആർട്ടിക് സർക്കിളിൽ നിന്നും വളരെ വടക്കായി ബാഫിൻ ഉൾക്കടലിന് സമീപമാണ് ഇത് സ്ഥിതി ചെയ്യുന്നത്.ലോകത്ത് മനുഷ്യവാസമേ ഇല്ലാത്ത ഏറ്റവും വലിയ ദ്വീപ് എന്ന റെക്കോർഡ് ഡെവൺ ദ്വീപിനാണ്.

വർഷത്തിൽ വളരെ കുറഞ്ഞ മഴയും മഞ്ഞുവീഴ്ചയും മാത്രമേ ഇവിടെ ലഭിക്കൂ. അതിശൈത്യം കാരണം അന്തരീക്ഷത്തിൽ ഈർപ്പം വളരെ കുറവാണ്.

കടുത്ത ശൈത്യം: ശീതകാലത്ത് താപനില -50°C വരെ താഴാറുണ്ട്. വേനൽക്കാലത്ത് പോലും ശരാശരി താപനില 10°C-ൽ താഴെയാണ്.

മണ്ണ് ഉറഞ്ഞുപോയ അവസ്ഥ (Permafrost): പാറക്കെട്ടുകളും മരവിച്ച കഠിനമായ മണ്ണും മാത്രമുള്ളതിനാൽ കൃഷിയോ സസ്യവളർച്ചയോ ഇവിടെ അസാധ്യമാണ്.

ഡെവൺ ദ്വീപിന്റെ നടുവിലായി 23 കിലോമീറ്റർ വ്യാസമുള്ള വലിയൊരു ഗർത്തമുണ്ട്—ഹോട്ടൻ ക്രേറ്റർ (Haughton Impact Crater).3.9 കോടി വർഷങ്ങൾക്ക് മുൻപ് ഒരു വലിയ ബഹിരാകാശ ഉൽക്ക വന്നിടിച്ചാണ് ഈ ഗർത്തം രൂപപ്പെട്ടത്.1997 മുതൽ നാസയുടെയും ഫ്ലാഷ്‌ലൈൻ മാർസ് ആർട്ടിക് റിസർച്ച് സ്റ്റേഷന്റെയും (FMARS) നേതൃത്വത്തിൽ ശാസ്ത്രജ്ഞർ വേനൽക്കാലത്ത് ഇവിടെ ക്യാമ്പ് ചെയ്ത് പഠനങ്ങൾ നടത്തുന്നു.

ശാസ്ത്രജ്ഞർ ബഹിരാകാശ വസ്ത്രങ്ങൾ (Space suits) ധരിച്ച്, ബാഹ്യലോകവുമായുള്ള ആശയവിനിമയം വെട്ടിക്കുറച്ച്, ചൊവ്വയിൽ ജീവിക്കുന്നത് പോലെയുള്ള കൃത്രിമ സാഹചര്യങ്ങൾ സൃഷ്ടിച്ചാണ് ഇവിടെ പരീക്ഷണങ്ങൾ നടത്തുന്നത്. ചൊവ്വയിലേക്ക് അയക്കുന്ന റോവറുകളും മറ്റ് സങ്കേതിക ഉപകരണങ്ങളും പരീക്ഷിക്കുന്നത് ഇവിടെവെച്ചാണ്.

കല്ലുകൾക്കടിയിലും കൊടും തണുപ്പിലും ജീവിക്കുന്ന ചില പ്രത്യേക ബാക്ടീരിയകളും പായലുകളും (Extremophiles) ശാസ്ത്രജ്ഞർക്ക് ചൊവ്വയിലെ ജീവന്റെ സാധ്യതകളെക്കുറിച്ച് പഠിക്കാൻ സഹായകരമാകുന്നു.

മനുഷ്യർക്ക് സ്ഥിരമായി ജീവിക്കാൻ അസാധ്യമായ അന്തരീക്ഷമാണെങ്കിലും, ബഹിരാകാശ ഗവേഷണരംഗത്ത് ചൊവ്വാഗ്രഹത്തെ കൂടുതൽ അടുത്തറിയാൻ ശാസ്ത്രജ്ഞരെ സഹായിക്കുന്ന ഏറ്റവും പ്രധാനപ്പെട്ട “നാച്ചുറൽ ലാബ്” ആണ് ഡെവൺ ദ്വീപ്.

Sreekala Prasad